ՀԱՅԿԱԿԱՆ ԳՐԱԴԱՐԱՆԱՅԻՆ ԱՍՈՑԻԱՑԻԱՆ 2011 ԹՎԱԿԱՆԻՆ

Հարգելի բարեկամներ,

<<Հայկական գրադարանային ասոցիացիա>> հասարակական կազմակերպությունը հիմնադրվել է 1994թ. հոկտեմբերի 7-ին` նպատակ ունենալով համախմբել հանրապետության գրադարանային աշխատողներին` մասնագիտական հարցերի լուծման և շահերի պաշտպանության նպատակով:

ՀԳԱ հանդես է եկել մի շարք նախաձեռնություններով, որոնք նրան ճանաչում են բերել հանրապետությունում և նրա սահմաններից դուրս: Ասոցիացիայի նախագահը և վարչության անդամներն ու գրադարանավարները մասնակցել են միջազգային մի շարք համագումարների, կոնֆերանսների, խորհրդակցությունների, հանդես եկել զեկուցումներով և ելույթներով:

Ասոցիացիան իրագործել է մի շարք ծրագրեր` կախված գրադարանային բազմաթիվ հիմնախնդիրների, հատկապես կադրերի վերապատրաստման, ժամանակակից գրադարանային գործընթացներին ծանոթացնելու և մասնագիտական իմացությունը խորացնելու նպատակով:

ՀԳԱ թերևս ամենակարևոր նախաձեռնությունը <<Ազգային գրադարանային շաբաթ>> մասշտաբային միջոցառման կազմակերպումը և անցկացումն է, որը հանրապետությունում արդեն ավանդույթի ուժ է ձեռք բերել և նվաճել հասարակության համակրանքը:

Ասոցիացիայի ջանքերը նպաստեցին, որ հանրապետությունում ընդունվի Գրադարանավարի օրը, որը 2004-ից նշվում է հոկտեմբերի 7-ին:

Ասոցիացիայի անդամների թիվը վերջին տարիներին բազմապատկվել է: Դա վկայում է այն մասին, որ գրադարանային աշխատողները ճանաչում և վստահում են այս կազմակերպությանը:

ՀԳԱ-ն հրատարակում է ամենամյա <<Հայկական գրադարան>> տարեգիրքը, որտեղ արծարծվում են գրադարանային աշխատողներին հետաքրքրող բազմաթիվ խնդիրներ:

2008-ին ասոցիացիան հրատարակեց նաև <<Գիրքը և ես>> դպրոցական լավագույն շարադրությունների երրորդ ընտրանին:

 Հայկական գրադարանային ասոցիացիայի գերխնդիրն է մեր գրադարանային հանրությանը միջազգային ասպարեզում ինտեգրելը և քաղաքակիրթ, գրագետ, ժողովրդական հասարակության ձևավորելուն նպաստելը: Թե որքանով դա կհաջողվի մեզ, ցույց կտա ժամանակը: Իսկ այժմ կոչ ենք անում համախմբվել գրադարանային ասոցիացիայի շուրջ և պահպանել ու զարգացնել հայոց բազմադարյան մշակույթը:

Լավագույն մաղթանքներով`